മണിപ്പൂരിലെ കലാപം;

മണിപ്പൂരിലെ കലാപം;

മണിപ്പൂരിലെ കലാപം;

Previous Next

ഒരു ഉല്മൂലന പദ്ധതിയോ? ജോസഫ് ജൂഡ് വൈസ് പ്രസിഡന്റ്, KRLCC മതേതര ജനാധിപത്യരാഷ്ട്രത്തിനേറ്റുകൊണ്ടിരിക്കുന്ന മുറിവുകളില്‍ ഏറ്റവും ഒടുവിലത്തെ തിരുമുറിവാണ് മണിപ്പൂരിലെ പീഡിത ജനതയ്ക്ക് ഏറ്റുകൊണ്ടിരിക്കുന്നത്. ആരാധനാലയങ്ങളെയും വിശ്വാസികളെയും നിഷ്‌കരുണം വേട്ടയാടുന്ന പ്രാകൃത നടപടികളുടെ നേര്‍ക്കാഴ്ച. ഇന്ത്യയുടെ വടക്ക് കിഴക്കന്‍ പ്രദേശങ്ങളിലെ ഏഴ് സംസ്ഥാനങ്ങളില്‍ ഒന്നാണ് മണിപ്പൂര്‍. നാഗാലാന്‍ഡ് വടക്കുഭാഗത്തും മിസോറാം തെക്കുഭാഗത്തും പടിഞ്ഞാറ് ഭാഗത്തായി അസമും മണിപ്പൂരിന്റെ അതിര്‍ത്തി കള്‍ പങ്കിടുന്നു. മ്യാന്‍മര്‍ എന്ന വിദേശ രാജ്യമാണ് കിഴക്ക് തെക്കുഭാഗത്ത് മണിപ്പൂരിന് അതിര്‍ത്തിയാകു ന്നത്. 2011-ലെ സെന്‍സസ് പ്രകാരം മണിപ്പൂരില്‍ 28.55 ലക്ഷമാണ് ജനസംഖ്യ. ജനസംഖ്യയുടെ 41.39% ഹിന്ദുമതവിശ്വാസികളും 41.29% ക്രിസ്ത്യാനികളും 8.40% മുസ്ലീങ്ങളും 8.19% ഗോത്രമതങ്ങളും പിന്തുടരു ന്നു. ഭൂരിഭാഗം ഹിന്ദുക്കളായ മെയ്തി ജനത, ജനസംഖ്യയുടെ മൂന്നില്‍ രണ്ട് ഭാഗവും മണിപ്പൂര്‍ താഴ്‌വര കൈവശപ്പെടുത്തുന്നു. ബാക്കിയുള്ള ജനസംഖ്യയില്‍ വടക്ക് നാഗകളും തെക്ക് കുക്കികളും പോലുള്ള തദ്ദേശീയ മലയോര ഗോത്രങ്ങള്‍ ഉള്‍പ്പെടുന്നു. ചരിത്രത്തിലെങ്ങും സമാനതകളില്ലാത്ത അക്രമവും അശാന്തിയും സംസ്ഥാനത്തെ പിടിച്ചുകുലുക്കി ഒരു കൊടുങ്കാറ്റുപോലെ മണിപ്പൂരില്‍ ആഞ്ഞടിച്ചുതുടങ്ങിയിട്ട് 2 മാസങ്ങള്‍ പിന്നിട്ടിരിക്കുന്നു. കഴിഞ്ഞ മെയ് മൂന്നു മുതലാണ് മണിപ്പൂരിലെ ആസൂത്രിതമെന്നു കരുതപ്പെടുന്ന വംശീയഹത്യയുടെ തുടക്കം. പക്ഷേ, ഇന്നും അക്രമവും തീവയ്പ്പും അനിയന്ത്രിതമായി തുടരുന്നു. പ്രത്യേകിച്ചും താഴ്‌വരയുടെ പ്രാന്ത പ്രദേശങ്ങളില്‍. സംസ്ഥാനത്തെ ഭരണഘടനാ സംവിധാനങ്ങളെക്കുറിച്ച് ഭയം, അനിശ്ചിതത്വം, നിരാശ എന്നതാണ് പൊതുവായ അവസ്ഥ. വടക്കുകിഴക്കന്‍ അതിര്‍ത്തി സംസ്ഥാനത്തെ പ്രബലമായ മെയ്തി സമുദായവും ന്യൂനപക്ഷമായ കുക്കി-സോമി ഹില്‍ ഗോത്രവും തമ്മിലുള്ള വംശീയ കലഹങ്ങള്‍ ഏറ്റവും ശക്തമായ രാഷ്ട്രീയഭരണകൂടത്തിന്റെയും സൈന്യത്തിന്റെ സുരക്ഷാ വലയത്തിന്റെയും ദ്രുതകര്‍മ സേന യുടെയും മറ്റ് കേന്ദ്ര അര്‍ധസൈനിക വിഭാഗങ്ങളുടെയും തീവ്രമായ വിന്യാസത്തിലും ആണെന്നത് നിരാ ശാജനകമാണ്. നിരപരാധികളായ മനുഷ്യര്‍ അനിയന്ത്രിതമായ അക്രമണങ്ങളില്‍ കൊല്ലപ്പെടുന്നു. നൂറു കണക്കിനു മനുഷ്യജീവനുകളാണ് നഷ്ടപ്പെട്ടത്. ആരാധനാലയങ്ങള്‍ അശുദ്ധമാക്കുകയും തീകൊളു ത്തുകയും ചെയ്തു. 200 ലധികം ഗ്രാമങ്ങളും ആയിരക്കണക്കിന് വീടുകളും സ്വത്തുക്കളും കൊള്ളയടിക്കു കയും അഗ്നിക്കിരയാക്കുകയും നശിപ്പിക്കുകയും ചെയ്തു. 60,000 ത്തിലധികം ആളുകള്‍ അവര്‍ താമസി ച്ചിരുന്ന സ്ഥലത്ത് നിന്ന് പലായനം ചെയ്യാന്‍ നിര്‍ബന്ധിതരാകുകയും ഭവനരഹിതരാകുകയും ചെയ്തു. ഇവരില്‍ ഭൂരിഭാഗവും ഇപ്പോഴും സംസ്ഥാനത്തെ വിവിധ ജില്ലകളിലെ ദുരിതാശ്വാസ ക്യാമ്പുകളില്‍ കഴിയുകയാണ്. കലാപത്തിനിടയില്‍ ക്രൈസ്തവര്‍ക്കെതിരെ ആസൂത്രിത അക്രമങ്ങള്‍ 2023 മെയ് 3-ന് ആരംഭിച്ച ആക്രമണത്തിന്റെ ഇരകളില്‍ ഭൂരിഭാഗവും പരമ്പരാഗതമായി മലയോര പ്രദേ ശങ്ങളില്‍ താമസിക്കുന്ന കുക്കി-സോമി ഗോത്ര ക്രിസ്ത്യാനികളാണ്. വിവിധ ക്രിസ്ത്യന്‍ വിഭാഗങ്ങളുടെ 400 ലധികം ആരാധനാലയങ്ങളും 83 പള്ളി സ്ഥാപനങ്ങളും ജനക്കൂട്ടം അഗ്നിക്കിരയാക്കുകയോ നശിപ്പി ക്കുകയോ ചെയ്തു. മെയ്തി ഹൃദയഭൂമിയായ ഇംഫാല്‍ താഴ്‌വരയില്‍ അക്രമം ആരംഭിച്ച് 36 മണിക്കൂറി നുള്ളില്‍ മെയ്തി ക്രിസ്ത്യാനികളുടെ 249 പള്ളികള്‍ ആസൂത്രിതമായ കൃത്യതയോടെ നശിപ്പിക്കപ്പെട്ടു. ആക്രമിക്കപ്പെട്ട 200 ലധികം കുക്കി ഗ്രാമങ്ങളില്‍ ഓരോന്നിലും ക്രിസ്ത്യന്‍ വിഭാഗങ്ങളുടെ എണ്ണത്തെ ആശ്രയിച്ച് ഒന്നോ അതിലധികമോ പള്ളികളുണ്ടായിരുന്നു. 2022 മാര്‍ച്ചില്‍ ഭാരതീയ ജനതാ പാര്‍ട്ടിയുടെ മുഖ്യമന്ത്രി എന്‍. ബിരേന്‍ സിംഗ് കേവല ഭൂരിപക്ഷ ത്തോടെ രണ്ടാം തവണയും വിജയിച്ചതു മുതല്‍ കുക്കി ഗോത്ര ജനതയ്‌ക്കെതിരെ വിദ്വേഷത്തിന്റെയും അന്യവല്‍ക്കരണത്തിന്റെയും ഒരു തീവ്രമായ വികാരം രൂപപ്പെടുകയായിരുന്നു. വിദേശികള്‍, അനധികൃത കുടിയേറ്റക്കാര്‍, പോപ്പി കര്‍ഷകര്‍, മയക്കുമരുന്ന് കച്ചവടക്കാര്‍, വനഭൂമിയിലെ കൈയേറ്റക്കാര്‍, തീവ്രവാദ കലാപകാരികള്‍, എന്നിങ്ങനെ കുക്കികളെ മുദ്രകുത്തി ആസൂത്രിതമായ പ്രചാരണം സംസ്ഥാനത്തെ ഭൂരിപക്ഷ രാഷ്ട്രീയവ്യവഹാരത്തില്‍ ശക്തി പ്രാപിച്ചിരുന്നു. അയല്‍രാജ്യമായ മ്യാന്‍മറില്‍ നിന്നുള്ള അനധികൃത കുടിയേറ്റക്കാരെ തിരിച്ചറിയാന്‍ ദേശീയ പൗരത്വ രജിസ്റ്റര്‍ വേണമെന്ന ആവശ്യത്തെ മെയ്തി രാഷ്ട്രീയക്കാര്‍ പിന്തുണയ്ക്കുന്നതും കുക്കികള്‍ക്കിടയില്‍ അമര്‍ഷത്തിനു കാരണമായിരുന്നു. മെയ്തി ഭൂരിപക്ഷ സമുദായത്തിന് പട്ടികവര്‍ഗ്ഗ പദവി നല്കാനുള്ള മണിപ്പൂര്‍ ഹൈക്കോടതി ഉത്തര വിനെ തുടര്‍ന്നുണ്ടായ രാഷ്ട്രീയപ്രക്ഷുബ്ധതയ്ക്ക് പിന്നിലെ പ്രധാന ഘടകം ഭൂമിയുടെ അവകാശങ്ങളു മായി ബന്ധപ്പെട്ട പ്രശ്‌നമാണ്. ആദിവാസികളുടെ ഭൂമിയുടെ അവകാശങ്ങള്‍ സംരക്ഷിക്കുന്നതിനുള്ള ഭരണഘടനാ വ്യവസ്ഥകളും മലയോര ഗോത്ര സമിതികളുടെ നിര്‍ബന്ധിത അംഗീകാരവും അവഗണിച്ച്, കുക്കി ഗ്രാമങ്ങളെ തലമുറകളായി താമസിക്കുന്ന വനഭൂമിയില്‍ നിന്ന് മാറ്റിപ്പാര്‍പ്പിക്കാന്‍ സംസ്ഥാന സര്‍ ക്കാര്‍ കുടിയൊഴിപ്പിക്കല്‍ നടപടികള്‍ ആരംഭിച്ചിരുന്നു. സംരക്ഷിത വനങ്ങള്‍, വന്യജീവി സങ്കേതങ്ങള്‍ എ ന്നിവയെക്കുറിച്ച് സര്‍ക്കാര്‍ പ്രഖ്യാപിച്ച സര്‍വേ ആദിവാസി ജനങ്ങളില്‍ നിന്ന് കടുത്ത എതിര്‍പ്പ് നേരിട്ടു. ഗോത്രവര്‍ഗക്കാരുടെ പ്രതിഷേധ റാലികള്‍ക്കും ഗോത്രേതര ശക്തികളുടെ പ്രത്യാക്രമണങ്ങള്‍ക്കും പ്രേരകമായത് ഇവയായിരുന്നു, ഇത് രക്തരൂക്ഷിതമായ വംശീയ സംഘട്ടനങ്ങളില്‍ കലാശിച്ചു. ഹൈക്കോടതി ഉത്തരവ് വംശീയ അശാന്തിക്കുള്ള ഉടനടി പ്രകോപനം മണിപ്പൂരിലെ ജനസംഖ്യയുടെ 53 ശതമാനം വരുന്നതും പ്രാഥമികമായി മണിപ്പൂര്‍ താഴ്‌വരയില്‍ അധിവ സിക്കുന്നതുമായ മെയ്തി സമുദായത്തെ എസ്ടി പട്ടികയില്‍ ഉള്‍പ്പെടുത്തണമെന്ന ആവശ്യമാണ് വംശീയ അശാന്തിക്കുള്ള ഉടനടി പ്രകോപനം. എന്നാല്‍ ഇത് ഒരു പ്രത്യക്ഷത്തിലുള്ള അടിയന്തര കാരണം മാത്ര മാണ്. വളരെക്കാലമായി ജ്വലിച്ചുനില്‍ക്കുന്ന അമര്‍ഷത്തിനും വര്‍ധിച്ചുവന്ന കോപത്തിനും ആധാരമാകുന്ന മറ്റ് കാരണങ്ങളുണ്ട്. സംസ്ഥാനത്തിന്റെ മലയോര മേഖലയിലെ സംരക്ഷിത വനങ്ങളും സര്‍ക്കാരിന്റെ നിയന്ത്രണവുമായി മാത്രമല്ല, കുക്കികളുടെ പീഡിപ്പിക്കപ്പെടുന്ന വികാരവുമായും ഇവ ബന്ധപ്പെട്ടിരിക്കു ന്നു. മ്യാന്‍മറിലെ അതിര്‍ത്തിക്കപ്പുറമുള്ള ഒരേ വംശീയ വിഭാഗത്തില്‍പ്പെട്ട നിരവധി ചിന്‍ ഗോത്രവംശ ത്തില്‍പ്പെട്ടവര്‍, അവിടെയുണ്ടാകുന്ന അക്രമണങ്ങളില്‍ നിന്നും പീഡനങ്ങളില്‍ നിന്നും രക്ഷപ്പെട്ട് ഇന്ത്യയിലേക്ക് കുടിയേറുന്നുണ്ടായിരുന്നു. ഇവര്‍ക്കെതിരായ ഗവണ്‍മെന്റിന്റെ കടുത്ത നിലപാട് അവരുടെ ബന്ധുക്കളായ കുക്കികളെ ചൊടിപ്പിച്ചു. മണിപ്പൂരിലെ മലനിരകളിലെ സംരക്ഷിത വനമേഖലകള്‍ ആദിവാസി സമൂഹങ്ങള്‍ കയ്യേറുന്നുവെന്ന ബിജെപി മുഖ്യമന്ത്രിയുടെ കടുത്ത നിലപാട് വിവിധ കാരണങ്ങളാല്‍ ഉരുത്തിരിഞ്ഞതാണ്. മയക്കുമരുന്നിനെതിരായ ഒരു വലിയ യുദ്ധത്തിന്റെ ഭാഗമായാണ് വനമേഖലകള്‍ക്കെതിരെയുള്ള അടിച്ചമര്‍ത്തല്‍ സര്‍ക്കാര്‍ കാണുന്നത്, എന്നാല്‍ എല്ലാ കുക്കി ജനതയ്‌ക്കെതിരെയും 'മയക്കുമരുന്ന് പ്രഭുക്കന്മാരെന്ന' പ്രയോഗം അനീതിയാണ്. രണ്ടാമതായി, മണിപ്പൂരിലെ ഭൂമിയില്‍ വര്‍ധിച്ചുവരുന്ന ആവശ്യമുയര്‍ത്തുന്ന ഗുരുതരമായ സമ്മര്‍ദ്ദമുണ്ട്. ആദിവാസി ഗ്രാമങ്ങളില്‍ ജനസംഖ്യ വര്‍ധിക്കുന്നതിനനുസരിച്ച്, അവര്‍ തങ്ങളുടെ ചരിത്രപരവും പൂര്‍വികവുമായ അവകാശമായി കണക്കാക്കുന്ന ചുറ്റുമുള്ള വനമേഖലകളിലേക്ക് വ്യാപിക്കുന്നു. ഈ വ്യാപനം സര്‍ക്കാര്‍ എതിര്‍ക്കുന്നു. അതേ സമയം, താഴ്‌വരകളില്‍ താമസിക്കുന്ന മെയ്തികള്‍ അവര്‍ക്ക് മലയോര പ്രദേശങ്ങളില്‍ താമസിക്കാനോ ഭൂമി വാങ്ങാനോ കഴിയാത്തതിനാല്‍ രോഷാകുലരാണ്, അതേസമയം ആദിവാസികള്‍ക്ക് താഴ്‌വരകളില്‍ ഭൂമി വാങ്ങാം. 1966-ല്‍ സംരക്ഷിത വനമായി പ്രഖ്യാ പിക്കപ്പെട്ട ചുരാചന്ദ്പൂര്‍ ജില്ലയിലെ ചുരാചന്ദ്പൂര്‍-ഖൗപും സംരക്ഷിത വനത്തില്‍ നടത്തിയ പെട്ടെന്നുള്ള റവന്യൂ, വനം സര്‍വേയെ പട്ടികവര്‍ഗക്കാര്‍ക്കുള്ള സംവരണ മണ്ഡലമായ സായ്‌ക്കോട്ടിനെ പ്രതിനിധീ കരിക്കുന്ന കുക്കി ഗോത്രവംശക്കാരനും ബിജെപി എം.എല്‍.എയുമായ പൗലിയന്‍ലാല്‍ ഹയോകിപ് ശക്തമായി ചോദ്യം ചെയ്തിരുന്നു. ഏപ്രില്‍ 12-ന് വൈദ്യുതി, വനം, പരിസ്ഥിതി, കാലാവസ്ഥാ വ്യതിയാന മന്ത്രി ബിശ്വജിത് സിങ്ങിനെ അഭിസംബോധന ചെയ്ത കത്തില്‍ ഹയോകിപ്പ വനം സര്‍വേയെ വിശേഷിപ്പിച്ചത് പൊതുജനങ്ങളില്‍ വലിയ വേദനയും അനീതിയുമെന്നാണ്. നിര്‍ദ്ദിഷ്ട സംരക്ഷിത വനമേഖലകളില്‍ നിന്ന് ചില വില്ലേജുകളെ ഒഴിവാക്കി മുന്‍ അസിസ്റ്റന്റ് സെറ്റില്‍മെന്റ് ഓഫീസറുടെ (ASO) ഉത്തരവ് സംസ്ഥാന സര്‍ക്കാര്‍ അസാധുവാക്കിയത് തെറ്റായിപ്പോയെന്ന് നിയമസഭയില്‍ ചൂണ്ടിക്കാട്ടിയിരുന്നതായി ഹയോകിപ് പറയുന്നുണ്ട്. 1927-ലെ ഇന്ത്യന്‍ ഫോറസ്റ്റ് ആക്ട് പ്രകാരമുള്ള സ്റ്റാറ്റിയൂട്ടറി അതോറിറ്റിയായ എഎസ്ഒയുടെ ഉത്തരവുകള്‍ സംസ്ഥാന സര്‍ക്കാരിന് എങ്ങനെ അസാധുവാക്കാന്‍ കഴിയുമെന്ന് അദ്ദേഹം ചോദിക്കുന്നു. ഇതിന് കാരണമായി ചൂണ്ടിക്കാണിച്ചിട്ടുള്ള അപേക്ഷകള്‍ പരിഗണിക്കുന്നതിലെ കാലതാമസം ബന്ധപ്പെട്ട അധികാരികളുടെ തെറ്റാണെന്നും ഭൂവുടമകളായ അപേക്ഷകരുടേതല്ലെന്നും ഹയോകിപ് പറയുന്നു. ഹയോകിപ്പിന്റെയും മറ്റ് ഗോത്രവര്‍ഗക്കാരുടെയും പ്രതിഷേധങ്ങള്‍ക്കിടയിലും ബിരേന്‍ സിംഗ് അചഞ്ചലനായി, സംരക്ഷിത വനങ്ങള്‍ വിപുലീകരിക്കുന്നതിനെതിരായ ഗോത്രവര്‍ഗക്കാരുടെ പ്രതിഷേധത്തിനെതിരെ ശക്തമായി മുന്നോട്ടു പോയി. മലയോര ജില്ലകളിലെ വനഘടനയിലെ മാറ്റങ്ങളെക്കുറിച്ച് പഠിക്കാന്‍ തന്റെ സര്‍ക്കാര്‍ സാറ്റലൈറ്റ് മാപ്പിംഗ് ഉപയോഗിക്കുന്നതായി സിംഗ് പറഞ്ഞിരുന്നു. കയ്യേറ്റങ്ങളെ വളരെ ഗൗരവമായി കാണുമെന്നും അതനുസരിച്ച് അവരെ കൈകാര്യം ചെയ്യുമെന്നും ഇതിനെതിരെ പ്രതിഷേധിക്കുന്ന ഏതൊരു നടപടിയും വനഭൂമി സംരക്ഷിക്കുന്നതിനുള്ള ഭരണഘടനാ വ്യവസ്ഥകള്‍ക്ക് വിരുദ്ധമാണെന്നും മുഖ്യമന്ത്രി മുന്നറിയിപ്പ് നല്കി. ഇതിന്റെ ഭാഗമായിതന്നെ 2023 ഏപ്രില്‍ 11- ന്, ലാംഗോള്‍ റിസര്‍വ് ഫോറസ്റ്റിനുള്ളില്‍ 26 വീടുകളില്‍ രണ്ടെണ്ണമെങ്കിലും തകര്‍ത്തു. 2023 ഫെബ്രുവരി 21-ന് ചുരാചന്ദ്പൂരിലെ കെ. സോങ്ജാങ് ഗ്രാമത്തിലെ താമസക്കാരെ 2020-ല്‍ ഗൂഗിള്‍ ചിത്രങ്ങളില്‍ ഈ പ്രദേശത്ത് ജനവാസമൊന്നും ഉണ്ടായിരുന്നില്ലെന്ന് കാണിച്ച് കുടിയൊഴിപ്പിക്കപ്പെട്ടു. ചുരചന്ദ്പൂരിലെ 38 ഗ്രാമങ്ങളുടെ അംഗീകാരം റദ്ദാക്കി. 2022 നവംബറില്‍ വനംവകുപ്പ് വിജ്ഞാപനം പുറപ്പെടുവിച്ചതിനെ തുടര്‍ന്നാണ് കുടിയൊഴിപ്പിക്കല്‍ നടന്നത്. ചുരാചന്ദ്പൂര്‍-ഖൗപും സംരക്ഷിത വനത്തിനുള്ളില്‍ ഉള്‍പ്പെട്ടതായി അവകാശപ്പെടുന്ന നോനി ജില്ലകള്‍. അര്‍ഹതയില്ലാത്ത ഉദ്യോഗസ്ഥനാണ് വില്ലേജുകള്‍ക്ക് താമസാനുമതി നല്കിയതെന്നും വിജ്ഞാപന ത്തില്‍ പറയുന്നു. സംസ്ഥാന മുഖ്യമന്ത്രിയുടെ നിലപാടിനെ കേന്ദ്രം പിന്തുണച്ചു. 1927- ലെ വനനിയമം സ്വാതന്ത്ര്യാനന്തരം സംസ്ഥാന വിഷയമായി മാറിയെന്നും എന്നാല്‍ 1976- ലെ ഭേദഗതിക്ക് ശേഷം വനഭൂമി സംസ്ഥാനത്തിന്റെ അധികാര പരിധിയിലാണെന്നും അടുത്തിടെ മണിപ്പൂര്‍ സന്ദര്‍ശിച്ചപ്പോള്‍ കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രി ഭൂപേന്ദര്‍ യാദവ് പറഞ്ഞു. വനത്തിന്റെ ഉടമസ്ഥാ വകാശം സംസ്ഥാന സര്‍ക്കാരിനാണെന്നും നിക്ഷിപ്തവും സംരക്ഷിതവുമായ വനഭൂമി സംരക്ഷിക്കാനുള്ള പൂര്‍ണ ഉത്തരവാദിത്തം സംസ്ഥാന സര്‍ക്കാരിനാണെന്നും അദ്ദേഹം പറഞ്ഞു. എന്നാല്‍ കുക്കികളുടെ അഭിപ്രായത്തില്‍, ആയിരത്തിലധികം ആളുകള്‍ വീതമുള്ള 38 ഗ്രാമങ്ങള്‍ കഴിഞ്ഞ 50-60 വര്‍ഷങ്ങളായി നിലനില്‍ക്കുന്നവയാണ്. മണിപ്പൂരിലെ കുക്കികളുടെ പരമോന്നത സംഘടനയായ കുക്കി ഇന്‍ഫി മണിപ്പൂര്‍ അല്ലെങ്കില്‍ കെഐഎം, ഈ വിഷയത്തെക്കുറിച്ചുള്ള ബിരേന്‍ സിങ്ങിന്റെ പ്രസ്താവന തെറ്റാണെന്നും മണിപ്പൂരിലെ 'സ്വേച്ഛാധിപത്യ ഭരണ'ത്തിനെതിരായ ആദിവാസി സമൂഹങ്ങളുടെ വിയോജിപ്പില്‍ നിന്ന് ശ്രദ്ധ തിരിക്കാന്‍ ഉദ്ദേശിച്ചുള്ളതാണെന്നും ആരോപിച്ചു. ബിജെപി ഭരിക്കുന്ന സംസ്ഥാന ഗവണ്‍മെന്റിന്റെ 'സെലക്ടീവ് ടാര്‍ഗെറ്റിംഗ്' ആയി കാണുന്നതിനെതിരെ കുക്കി സമൂഹത്തിന്റെ രോഷം ഹൈക്കോടതി ഉത്തരവിനെതിരെ നടന്ന പ്രതിഷേധ മാര്‍ച്ചിലും പ്രതിഫലിച്ചിട്ടുണ്ടാകാം, ഇത് അക്രമത്തിലേക്കും നയിച്ചു. മാര്‍ച്ച് 10-നുതന്നെ, ചുരാചന്ദ്പൂര്‍, ഉഖ്രുല്‍, കാങ്‌പോക്പി, തെങ്‌നൗപല്‍, ജിരിബാം, തമെങ്‌ലോംഗ് എന്നിവയുള്‍പ്പെടെ മലയോര ജില്ലകളില്‍ ബഹുജന റാലികള്‍ നടന്നിരുന്നു. ബിജെപി ഭരിക്കുന്ന സര്‍ക്കാര്‍ കുക്കികളെ സെലക്ടീവ് ടാര്‍ഗെറ്റിംഗ് ആയി കണക്കാക്കുന്നതില്‍ കുക്കി ഗോത്രത്തിലെ ആയിരക്കണക്കിന് അംഗങ്ങള്‍ അന്ന് പ്രതിഷേധിച്ചിരുന്നു. കുക്കികള്‍ ഉള്‍പ്പെടുന്ന ആദിവാസി വിഭാഗങ്ങളുടെ കൂട്ടായ്മയായ ഇന്‍ഡിജിനസ് ട്രൈബല്‍ ലീഡേഴ്‌സ് ഫോറം (ഐടിഎല്‍എഫ്) ആയിരുന്നു റാലികള്‍ക്ക് ആഹ്വാനം ചെയ്തിരുന്നത്. മാര്‍ച്ച് 11-ന് നടന്ന ത്രികക്ഷി ചര്‍ച്ചയില്‍ നിന്ന് റാലികളില്‍ പ്രതിഷേധക്കാരെ പ്രേരിപ്പിച്ചു വെന്ന് ആരോപിച്ച് സംസ്ഥാന സര്‍ക്കാര്‍ പിന്മാറി. കുക്കി നാഷണല്‍ ആര്‍മി, സോമി റവല്യൂഷണറി ആര്‍മി എന്നീ രണ്ട് സായുധ രാഷ്ട്രീയ ഗ്രൂപ്പുകളുമായുള്ള സസ്‌പെന്‍ഷന്‍ ഓഫ് ഓപ്പറേഷന്‍ (SoO) കരാര്‍ പിന്‍വലിച്ചു, 2008-ല്‍ കേന്ദ്ര-സംസ്ഥാന സര്‍ക്കാരുകള്‍ മലനിരകളിലെ ആദിവാസി സായുധ സംഘ ടനകളായ യുണൈറ്റഡ് പീപ്പിള്‍സ് ഫ്രണ്ടും കുക്കി നാഷണല്‍ ഓര്‍ഗനൈസേഷനുമായും ഒപ്പുവച്ച വെടി നിര്‍ത്തല്‍ കരാറാണ്. കുക്കി നാഷണല്‍ ആര്‍മിയും സോമി റെവല്യൂഷണറി ആര്‍മിയും. കുക്കി നാഷണ ല്‍ ഓര്‍ഗനൈസേഷന്റെ ഭാഗമാണ്. (ഇവയെല്ലാം സായുധ സംഘടനകളാണ്.) പട്ടികയിലുള്‍പ്പെട്ട മലയോ രമേഖലകളോടുള്ള (Scheduled Hill Areas) സര്‍ക്കാരിന്റെ അങ്ങേയറ്റത്തെ അവഗണന'യിലും മണിപ്പൂരിന് ബാധകമായ ഭരണഘടനയുടെ ആര്‍ട്ടിക്കിള്‍ 370, 371 സി എന്നിവയിലുമുള്ള പൊതുജനങ്ങളുടെ അതൃപ്തിയുടെ ഫലമാണ് റാലികള്‍ എന്ന് കുക്കി ഇന്‍ഫി മണിപ്പൂര്‍ തറപ്പിച്ചുപറഞ്ഞിരുന്നു. മണിപ്പൂരില്‍ ദീര്‍ഘകാലമായി തുടര്‍ന്നുവന്നിരുന്ന വംശീയ സംഘര്‍ഷങ്ങള്‍ ഭീകരമായ ഒരു തലത്തി ലേക്ക് വളര്‍ത്തുന്നതും നിയന്ത്രിക്കാന്‍ കഴിയാത്തവിധം കലാപ രൂക്ഷിതമാവുന്നതിനും കേന്ദ്ര സംസ്ഥാന സര്‍ക്കാരുകളുടെ നിലപാടുകളും നടപടികളും കാരണമായിട്ടുണ്ട് പ്രത്യക്ഷത്തില്‍ വംശീയ കലാപമെന്ന് വിവരിക്കപ്പെട്ടെങ്കിലും, അക്രമങ്ങളുടെയും അക്രമിക്കപ്പെട്ട ഇടങ്ങളും അതിലെ വിന്യാസവും വേഗതയും സായുധസേനകളുടെ നിസ്സഹായതയും ഭരണാധികാരികളുടെ ഭയപ്പെടുത്തുന്ന നിശബ്ദതയും ഒരു മതവിഭാഗത്തെ തന്നെ ഉല്മൂലനം ചെയ്യാനുള്ള നിഗൂഡ പദ്ധതിയെപ്പറ്റിയും സംഘടിത ആസൂത്രണത്തെപ്പറ്റിയുമുള്ള ആശങ്കകള്‍ ഉയര്‍ത്തുകയാണ്. മണിപ്പൂരില്‍ എന്ന് സമാധാനം പുലരും? മണിപ്പൂരിലെ ഹൈക്കോടതി മാര്‍ച്ച് 27-ല്‍ പുറപ്പെടുവിച്ച വിധി തിരുത്തുന്നതിനുള്ള ഹര്‍ജി നടപടികള്‍ ക്കായി സ്വീകരിച്ചിരിക്കുകയാണ്. മണിപ്പൂരിലെ പ്രബല സാമൂഹിക വിഭാഗമായ മെയ്തി സമൂഹത്തെ പട്ടിക വര്‍ഗ പട്ടികയില്‍ ഉള്‍പ്പെടുത്തണമെന്ന ഉത്തരവ് പുറപ്പെടുവിച്ച ജസ്റ്റീസ് എം.വി മുരളീധരനാണ് ഇപ്പോഴത്തെ ആക്ടിംഗ് ചീഫ് ജസ്റ്റീസ് . മെയ്തി ട്രൈബ്‌സ് യൂണിയനാണ് (MTU) പുനഃപരിശോധനാ ഹര്‍ജിയുമായി കോടതിയെ സമീപിച്ചത്. ഈ വിധിയില്‍ സുപ്രിം കോടതിയുടെ കടുത്ത പരാമര്‍ശങ്ങളുടെ അടിസ്ഥാനത്തില്‍ കൂടിയാവണം ഈ തീരുമാനം. ഒരു സമുദായത്തെയൊ സമൂഹത്തേയോ പട്ടികജാതി, പട്ടികവര്‍ഗത്തില്‍ ഉള്‍പ്പെടുത്താനുള്ള പാര്‍ലമെന്റിന്റെയും രാഷ്ട്രപതിയുടെയും അവകാശത്തിന്മേലുള്ള ഇടപെടലാണെന്നുമായിരുന്നു സുപ്രീം കോടതി നിരീക്ഷിച്ചിരുന്നത്. മെയ്തികള്‍ക്ക് എസ്ടി പദവി നല്‍കാന്‍ സര്‍ക്കാര്‍ ശുപാര്‍ശ ആവശ്യപ്പെട്ട ഹൈക്കോടതി ഉത്തരവ് പ്രകോപനപരമായിട്ടാണ് കാണുന്നത്. മെയ്തികള്‍ക്കിടയില്‍ പോലും ഇതിനെതിരെ എതിര്‍പ്പു ഉയര്‍ന്നിരുന്നു. 2,000 വര്‍ഷത്തിലേറെയായി മെയ്തികള്‍ ഇംഫാല്‍ താഴ്‌വരയില്‍ സ്ഥിരതാമസമാക്കിയ കാര്‍ഷിക സമൂഹമാണെന്ന് അവരുടെ ചരിത്രം ഉറപ്പിക്കുന്നു. മണിപ്പൂര്‍ അക്രമങ്ങള്‍ ആരംഭിക്കുന്നത് മെയ് മൂന്നിന് പത്ത് മലമേഖലാ ജില്ലകളില്‍ നടന്ന ഗോത്ര വര്‍ഗ ഐക്യദാര്‍ഢ്യ മാര്‍ച്ചിനു ശേഷമാണ്. നിശബ്ദരാകുന്ന ഭരണാധികാരികള്‍, നിസ്സഹായരാകുന്ന സംവിധാനങ്ങള്‍ സംസ്ഥാനത്ത് ഭരണഘടനാ സംവിധാനങ്ങളുടെ സമ്പൂര്‍ണ തകര്‍ച്ചയാണ് സംഭവിച്ചുകൊണ്ടിരിക്കുന്നത്. ആഭ്യന്തര സംഘര്‍ഷങ്ങള്‍ക്കുള്ള അടിയന്തര വ്യവസ്ഥകള്‍ പ്രകാരം പ്രശ്‌നബാധിത സംസ്ഥാനത്തെ ക്രമസമാധാനം ഏറ്റെടുത്തതായി പറയപ്പെടുന്ന കേന്ദ്ര സര്‍ക്കാരും പൂര്‍ണമായും കഴിവില്ലാത്ത സംസ്ഥാന സര്‍ക്കാരും അക്രമം നിയന്ത്രിക്കുന്നതില്‍ പരാജയ പ്പെട്ടു. സംസ്ഥാനം ഒരു കലാപഭൂമിയായി മാറിയിട്ടും, മണിപ്പൂരിലെ കൂട്ടക്കൊലയോടും കലാപത്തോടും പ്രതികരിക്കുന്നതില്‍ രാജ്യത്തിന്റെ പ്രധാനമന്ത്രി പരാജയപ്പെട്ടു എന്നത് വിചിത്രമാണ്. അക്രമങ്ങള്‍ അവസാനിപ്പിക്കാനുള്ള സര്‍ക്കാരിന്റെ തീരുമാനമില്ലായ്മ ആശങ്കാജനകമാണ്. നിലവിലെ പിരിമുറുക്കങ്ങള്‍ ലഘൂകരിക്കുന്നതിനും ഈ അതിവൈകാരിക മേഖലയില്‍ ശാശ്വത സമാധാനം കൊണ്ടുവരുന്ന സുസ്ഥാപിത നീതി തത്വങ്ങളെ അടിസ്ഥാനമാക്കിയുള്ള ഒരു രാഷ്ട്രീയ പ്രക്രിയ ആരംഭിക്കുന്നതിനും ജനാധിപത്യ റിപ്പബ്ലിക്കിന്റെ പരമോന്നത തലവന്‍ എന്ന നിലയില്‍ രാഷ്ട്രപതി ഭരണഘടനാപരവും ധാര്‍മികവുമായ അധികാരത്തോടെ ഇടപെടണം. സുപ്രീം കോടതി നിര്‍ദ്ദേശിച്ചതുപോലെ, അക്രമത്തില്‍ നിന്ന് കുടിയൊഴിപ്പിക്കപ്പെട്ട ആളുകളുടെ സംരക്ഷണം, രക്ഷാപ്രവര്‍ത്തനം, പുനരധിവാസം എന്നിവയ്ക്ക് ഏറ്റവും മുന്‍ഗണന നല്കണം. നഷ്ടപരിഹാരം, പുനരധിവാസം, അനുരഞ്ജനം, സമാധാനം, സാധാരണ നില, ഐക്യം എന്നിവ പുനഃസ്ഥാപിക്കുന്നതിനുള്ള ശക്തമായ നടപടികള്‍ക്കൊപ്പം സംസ്ഥാനത്തിന്റെ എല്ലാ ഭാഗങ്ങളിലും അക്രമം നിയന്ത്രിക്കാന്‍ ദൃഢവും സുസ്ഥിരവുമായ ശ്രമങ്ങളും അനിവാര്യമാണ്. മതസ്വാതന്ത്ര്യം, സ്വന്തം മതവും വിശ്വാസവും ആചരിക്കാനുള്ള മൗലികാവകാശം, മലയോര ജനതയുടെ പാരമ്പര്യാവകാശങ്ങള്‍ എന്നിവയുമായി ബന്ധപ്പെട്ട ഭരണഘടനാ വ്യവസ്ഥകള്‍ അക്ഷരാര്‍ഥത്തില്‍ സംരക്ഷിക്കപ്പെടണം, മണിപ്പൂര്‍ സാധാരണ നിലയിലേക്ക് മടങ്ങുന്നതിന്റെ സൂചനകളുണ്ട്. ദേശീയ അന്തര്‍ദേശിയ തലങ്ങളി ല്‍ ഉയര്‍ന്നുവന്ന പ്രതിഷേധങ്ങള്‍ സര്‍ക്കാരുകളെ പ്രശ്‌നപരിഹാരത്തിനായി പ്രേരിപ്പിക്കുന്നുണ്ടാവാം. അഭയാര്‍ഥികളായി രാജ്യത്തിന്റെ വിവിധ ഭാഗങ്ങളിലുള്ളവരെ തിരികെയെത്തിക്കുന്നതിനും സമാധാ നപര മായും ആന്മവിശ്വാസത്തോടെയും ജീവിക്കാന്‍ സഹായിക്കുന്ന പുനരധിവാസവും ഏതുവിധത്തില്‍ നടപ്പാക്കും എന്നതിനെപ്പറ്റി ആശങ്കകളുണ്ട്. എല്ലാവര്‍ക്കും സ്വീകാര്യമായ ഒരു ദീര്‍ഘകാല കരാര്‍ കൊണ്ടുവരുന്നതില്‍ ബിജെപി ഭരിക്കുന്ന കേന്ദ്രവും സംസ്ഥാനവും എത്രത്തോളം വിജയിക്കുമെന്നും കാത്തിരുന്ന് കാണേണ്ടതാണ്.